غیبت

نیم بے ہوشی میں جب اس نے آنکھیں کھولیں تو اپنے آپ کو ایک انجان سی جگہ پر پایا...اس نے تھوڑی ہمت کر کے اٹھنا چاہا لیکن اسے اپنا وجود بہت بوجھل لگا... اس کے ساتھ ہی اسے اپنے ہاتھ خون میں لت پت لگے اور اسے محسوس ہوا کہ اسکے آگے کوئی بےجان چیز پڑی ہوئی ہے اس نے جب دیکھا تو کوئی مردہ حالت میں پڑا ہوا تھا .. مردے کو دیکھ کر اس کے پاؤں سے زمین نکل گئی ... ابھی اس کا جسم خوف سے لرز رہا تھا کہ اچانک ہی وہ برے طریقے سے اس مرے ہوئے انسان کا گوشت کھانے لگ گئی پر وہ یہ بات سمجھ نہیں پارہی تھی کہ وہ انسانی گوشت کیوں اورکیسے کھاۓ جا رہی تھی...اس وقت وہ اپنے آپ کو دنیا کا ایک سب سے زیادہ بےبس انسان محسوس کررہی تھی... آج وہ جس شخص کو کسی بھوکے شیر کی مانند کھاۓ جارہی تھی وہ اس کا آشنا چہرہ تھا...
اس نے مردے کی شناخت کرنے کی کوشش کی اور چہرہ پہچاننے پر وہ تڑپ اٹھی ... اسے یقین نہیں آ رہا تھا کہ یہ اس کا ہی وجود تھا جو اپنے ہی سگے بھائی کو نوچ نوچ کر کھاۓ جا رہا تھا؟؟؟

ایک لمحے کو اسے محسوس ہوا کہ وہ بھی مر جائے گی لیکن ایسا نہیں ہوا...وہ اپنے بھائی کا گوشت ایک خونخوار درندے کی طرح کھاتی گئی اور ساتھ ہی وہ اپنے ماضی کا محاسبہ کرنے لگی اسے یاد نہیں پڑ رہا تھا کہ اس نے اپنی زندگی میں حقوق اللہ یا حقوق العباد میں کوئی کوتاہی برتی ہو پھر اسے کس غلطی یا گناہ کی سزا دی جا رہی ہے؟؟؟ ابھی یہ باتیں اس کے ذہن میں گردش کر ہی رہی تھی کہ وہ لفظ "گناہ" پر جا رکی...

اسی وقت اسے وہ آیت یاد آگئی جو وہ اکثر سن کر نظر انداز کر دیتی تھی
یٰۤاَیُّہَا الَّذِیۡنَ اٰمَنُوا اجۡتَنِبُوۡا کَثِیۡرًا مِّنَ الظَّنِّ ۫ اِنَّ بَعۡضَ الظَّنِّ اِثۡمٌ وَّ لَا تَجَسَّسُوۡا وَ لَا یَغۡتَبۡ بَّعۡضُکُمۡ بَعۡضًا ؕ اَیُحِبُّ اَحَدُکُمۡ اَنۡ یَّاۡکُلَ لَحۡمَ اَخِیۡہِ مَیۡتًا فَکَرِہۡتُمُوۡہُ ؕ وَ اتَّقُوا اللّٰہَ ؕ اِنَّ اللّٰہَ تَوَّابٌ رَّحِیۡمٌ ﴿۱۲ الحجرات﴾

اے لوگوجوایمان لائے ہو!بہت گمان کرنے سے بچو،بلاشبہ بعض گمان گناہ ہوتے ہیں اور جاسوسی نہ کرواورتم میں سے کوئی کسی کی غیبت نہ کرے،کیاتم میں سے کوئی پسند کرتاہے کہ وہ اپنے مردہ بھائی کاگوشت کھائے؟سوتم اُس کوناپسندکرتے ہواور اللہ تعالیٰ سے ڈرو یقیناًاللہ تعالیٰ بہت توبہ قبول کرنے والا،نہایت رحم والاہے۔

اسے وہ وقت بھی یاد آیا کہ وہ کس طرح گھنٹوں گھنٹوں لوگوں کی غیبت اور جاسوسی میں مصروف رہتی تھی جس کی سزا آج وہ ایسے بھگت رہی ہے...وہ اللہ کے حضور اپنے گناہوں کی معافی مانگتے بلک بلک کے رو دی تھی کہ شاید اللہ عزوجل اس کی توبہ قبول کرکے اس پر رحم فرمادے....
اللہ پاک ہم سب کو اس گناہ سے بچنے کی توفیق عطا فرمائے.. آمین
ندا نثار ❤️